بسم الله الرحمن الرحيم

سبحان الله وبحمده سبحان الله العظيم





بكل عفوية.. وبروح مرحة ... يروي الشاب الغزاوي كيف يقضي يومه خلال الحرب...
اترككم معه..!!

ويقول:

واجا اليوم العشرين..
وكل يوم بنقول هادة أقوى يوم.. وأعنف يوم ..
لا بس بجد.. اليوم أعنف وأقوى يوم شفناه..
كنا نشوف أغلب القصف على التلفزيون .. هلقيت صار قدامنا مباشر..
طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..
مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..
لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..

طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..
مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..
بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..
بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..
أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ولو ضل معكم وقت.. إدعولي أصير غني..


ونشوفكم على خير..

--------منقول -------

سبحان الله
هذا في مكان بعيد والله اعلم عن الحدود

بحسب ما فهمت انه من منطقة تم التوغل فيها في اواخر ايام الحرب وتم طرد اليهود منها بعد ذلك وانتقاما قاموا بقصف عشوائي وتدمير كيدي لكل ما في وجههم واذا لم يخب ظني هو من تل الاسلام بحسب ما فهمت اكرر

السلام عليكم

واذا لم يخب ظني هو من تل الاسلام بحسب ما فهمت اكرر

أحسنت القول تل الإسلام وليس الهوى
كما أسماه شيخنا الحبيب أحمد ياسين

نعم هو ذاك
قد اسماها كذلك الشيخ احمد ياسين رحمه الله وتقبله في الشهداء

وهذه يوميات شاب رفحاوي جاءت لتكمل لنا يوميات الغزاوي :)
================================

يقطع شره اللي كاتبها تقول باقي عايش معي .. ونسي يذكر قصة ابن الكلبة تبع جيش الدفاع اللي بينطلنا كل شوي لدرجة صرت اسمع الكلام اللي بيحكيه عن غيب
لما ينطلنا الكلب الاول ويقول ( بلاغ عسكري - الى سكان المنطقة من اجل سلمتكم ( لاحظ سلمتكم مش سلامتكم ) انكم مطالبون باخلاء منطقة سكناكم فوراً والتوجه الى مراكز المدن ) طبعاًَ كأنه مراكز المدن امنة !

وابن الكلب التاني :
( تيت تيت طوووط ( هادا اول ميخش عالراديو ) اليكم اخر الانباء في قوطاع غزة ( لاحظ قوطاع غزة مش قطاع غزة ) قام جيش الدفاع الاسرائيلي باعطاء سكان قطاع غزة مهلة 3 ساعات لزيادة مخزونهم من السلع والبضائع ( شايفين زيادة مخزونهم يعني مخزون السكان مليان وهم من شدة انسانيتهم خلوكم تزيدوا مخزونكم ) .. عدد القتلى في عناصر حماس الارهابية تجاوز الـ 400 قتيل وحماس تتكتم على خسائرها ... يواصل جيش الدفاع الاسرائيلي عملياته ضد عناصر حماس الارهابية ويدعوا سكان قوطاع غزة الى الابتعاد عن المناطق التي ينشط بها عناصر حماس الارهابية )

طبعاً في بيانات خاصة بالمدن يعني مثلاً البيان الخاص بمدينة رفح :
( يا سكان مدينة رفح سيقوم جيش الدفاع الاسرائيلي بقصف المنازل التي تحتوي على انفاق او يمر من اسفلها انفاق لذلك من اجل سلمتكم جيش الدفاع الاسرائيلي يدعوا سكان حي البرازيل وحي السلام وحي الشعرة وحي القشوط ومخيم يبنا وحي البراهمة والشعوت باخلاء مناطق سكناهم من الشريط الحدودي وحتى شارع البحر ( واللي الكل مش عارفه انه المنطقة الممتدة من الشريط الحدودي وحتى شارع البحر واللي بيدعوا الناس لاخلائها يسكن فيها ما يزيد عن 40% من سكان رفح يعني تقريباً بيطالبوا نص سكان رفح باخلاء منازلهم )

وطبعاً في الحرب هادي اليهود جربوا فينا كل انواع الاسلحة الجديدة , زمان كانت الاف 16 تقصف الصاروخ قصف هلقيت الوضع اتغير صارت الطيارة تيجي فوق المكان وترمي الصواريخ رمي كأنها بتزقلهم والصاروخ وهو نازل بيصير يقول ( وزززززز ) زي صوت الصفارة وبعد هيك بتشوف الانفجار وما بتسمعه لانه بينفجر تحت الارض بس بتحس رفح كلها صارت تهز وفيه بعض الانواع بتهز رفح وبعد هيك بتسمع صوت الانفجار وفي منها بتسمع صوت الانفجار وبعد هيك بتشوف الدخنة .. يعني انواع واشكال وكأنه الطيار مشارك في برنامج ما يطلبه المواطنون ... بيحبوا يشكلوا من الانواع عشان الناس ما تزهق .

وطبعاً ما تنسوا التليفونات واللي اغلبها :
(المتصل : الووو السلام عليكم القصف عند بيتكم
اهل الدار: لا والله بس هو اعتقد في مخيم يبنا او بلوك O
المتصل : طيب الحمد لله على سلامتكم )

( المتصل : الووو السلام عليكم القصف عندكم
اهل الدار : اه والله القصف جنب البيت بس الحمد لله الجميع بخير بس حلوقة الشباك والابواب طارت .
المتصل : طيب الحمد لله على سلامتكم في المال ولا في العيال )

اما اذا كان المتصل من برة فممكن يكون حاجة من الاتين يا اما المتصل من دول عربية

( المتصل : السلام عليكم هل انتوا من قطاع غزة
اهل ادار : اه و الله يخوي
المتصل : ربنا ينصركم ربنا يقويكم والله قلوبنا بتتقطع عليكم
اهل الدار : الله يخليك والله احنا بحاجة لدعواتكم وبارك الله فيكم
سبحان الله تقول القصف بيحلاش لليهود وهم بيتصلوا فيك وفي نص المكالة بيقاطع صوت بوووف ( صاروخ يعني ) وانت بتقول للمتصل عن اذنك والله القصف جنبنا وبدال مهو يصير يخفف عليك انت اللي بتصير تخفف عليه والله ما فينا حاجة خلص اهدى والله القصف بعيد ومن الكلا هادا )

اما اذا كنت سيئ الحظ فالاتصال بيكون من اولاد الكلب جيش الزفت عى روسهم

( بلاغ عسكري صادر عن جيش الدفاع الاسرائيلي .. جيش ادلفاع الاسرائيلي سيستهدف كل مكان يحتوي على اسلحة او انفاق تتبع لعناصر حماس الارهابية .. من اجل سلمتكم كل منزل يحتوي على عتاد او نفق مطالب باخلاء منزله )


وابيخ حاجة كانت تلاقي كل المخيم ولا كل الحي اخلوا بيوتهم فكركم ليييش ؟!!
القصة باختصار تلاقوا بيطلع اول بيت بيلحقه اللي بعده لحد مالمخيم كله يخلي بيته تروح تسأل الناس ليش اخليتوا بيتكم بيقلك شفت كل الحارة اخلت بتروح تسأل تاني ليش اخليت بيتك بيقلك والله مانا عارف لاقيت اللي قدامي بيخلي بيته بتروح تسأل اللي قدامه ليش اخليت بيتك بيقلك اللي قدامي قال انه في بيت فلان الفلاني بده ينقصف بتروح تسأل صاحب البيت اللي بده ينقصف كيف عرفت انه بيتك بده ينقصف بيقلك اتصلوا علي وقالوا اخلي بيتك ( عاد هو لا بيكون اله في حماس ولا في المقاومة ولاحتى بيعرف يحمل مسدس مية ) بتقله وشو بدهم فيك اليهوةد ليقلولك اخلي بيتك بيقلك اتصلوا في وحكولي هيك هكي وبتتفاجئ انه الاتصال كان عبارة عن الاسطوانة المسجلة اللي موجودة فوق ( تبعت الانفاق والعتاد ) وفي الاخر كل المخيم بتلاقيه طلع من بيته عشان واحد بيحسب حاله محمد الضيف واليهود حيسيبوا كل البيوت ويقصفه بيته !!

وطبعاً شوفوا كيف اليهود مسالمين يعني لما بدهم يقصفوا بيت اول اشي بيتصلوا على صاحب البيت واذا ما رد بيتصلوا على جيرانه او قرايبه يخبروه انه يخلي بيته ولكن في معظم الاحيان الزنانة بتخلع صاروخ على البيت اللي بدهم يقصفوه فهاد الصارخ عبارة عن صاروخ تحذيري يعني بيشيل ابو غرفة ولا غرفتين في البيت وبعديها بـ 10 دقائق بتيجي الاف 16 بتخلي البيت اثر بعد عين .. ايش بدكوا احن والطف من هيك ؟!

وطبعاً اليهود اولاد الحرام بيحبوا يستخفوا دمهم .. معرفوش يتصلوا على قائد في القسام في رفح فراحوا اتصلوا على بيت اخته والظابط قلهم احكوا لاخوكم يخلي بيته واذا عنده شاليط يخليه بالمرة ... واخر موضة تبعت اللي بيجي عالراديو او عالتليفون وبيحكيلك واللي عئله في راسه بيعرف خلاصوا !!

صحيح نسيت اقول انه افيخاي ادرعي المتحدث باسم جيش اولاد الكلب بيخش عالشبكة وعلى مواقع حماس وكمان بيسمع لاذاعة الاقصى وهاد الكلام حكاه في لقاء عالجزيرة انه سمع بنفسه اذاعة الاقصى بتحكى كذا وةكذا وجاب صور من منتديات تابعة لحماس

فعشان هيك رغم كله الدمار والشهداء والقتل بنقل ادرعي الكلب اللي قاعد بيقرا ردي هلقيت صحيح انتوا دمرتوا كتير وقتلتوا كتير بس نفسياتنا هي هي زي مكانت قبل الحرب وراح تضل مرفوعة بإذن الله .. ولاحظ يا ادرعي انكم كنتوا تقصفوا كل قطاع غزة بالصواريخ والاولاد في المخيمات كانوا بيلعبوا كورة في الشارع وحتى في المنطقة اللي كنت فيها كانوا عاملين الدورة الاولمبية للبنانير ( القلول ) في حين فئرانكم كانت تلتزم ملاجئها طوال اليوم وخايفين من صاروخ جراد او صارخ القسام اللي يدوب يجي مسدس مية مقارنة بصواريخكم وجيوشكم ..
واللي حيغيظك اكتر واكتر انه القصف كان على الانفاق في رفح وكانوا يعبوا سولار وبنزين ولا كأنه الطيارة في الجو ولليوم ما زالوا بيعبوا بنزين وسولار ولبكرة ولبعد بكرة .. سلام يا ادرعي الكلب

لما ينطلنا الكلب الاول ويقول ( بلاغ عسكري - الى سكان المنطقة من اجل سلمتكم ( لاحظ سلمتكم مش سلامتكم )

اليكم اخر الانباء في قوطاع غزة ( لاحظ قوطاع غزة مش قطاع غزة )

واخر موضة تبعت اللي بيجي عالراديو او عالتليفون وبيحكيلك واللي عئله في راسه بيعرف خلاصوا !!


كم كانت تغيظني هذه الكلمة وأزيدك أنه في أول مرة اخترق فيها إذاعتي الأقصى والقدس كان يقول :
من أجلي سلمتكم .. كانت هذه تغيظني جدا وكلما أردت ذكر هذا المدعو كنت أقول من أجلي سلمتكم

وهذه أيضا كسابقتها .. اللهم لا شماتة !

وأما هذه فقد أغلقت السماعة وانطلقت مباشرة ضحكة ساخرة من هذا المدعو
ما جعلني أتأكد أنه عميل وليس إسرائيليا .. لأن اللهجة ظاهرة للعيان أنها لهجة فلسطينية ينطقها عميل خائن
والله أعلم

عموما .. أيا يكن هذا الأخرق فكنت أتمنى لو أنه يؤنس وحدة جلعاد
للأسف جئنا لجلعاد بثلاثة أصدقاء ولكن الصهاينة قتلوهم حتى يرتاحوا منهم
لأنهم بجلعاد واحد لم يسلموا فكيف بالجلاعيد ؟!

اللهم سدد رمي المجاهدين ليأخذوا الأسرى من بني يهود

بوركت

ولكن لا يخاف جلعاد
فالشلاليط كثر وان شاء الله الا ما يجي كم واحد يؤنس وحدته
فالمعركطة انتهت ولكن الحرب لم تنته بعد