قصة قصيرة نقدية ساخرة كتبتها منذ سنين
لكن باللهجة اللبنانية
اشك ان تفهموها كلكم :)
عزام


جارة 1: صباح الخير يا جارة
جارة 2: صباح النور
جارة 1: كيفك كيف صحتك
جارة 2: الحمد لله
جارة 1: تفضلي لعنّا
جارة 2: ما بقدر جوزي بالبيت ناطر حضرلو ترويقة.
جارة 1: خير. شبو شي من غير شر؟
جارة 2: لك ما شبو شي متل الحصان يخزي العين بس آخذ اجازة. بدّو يتدلّع عليّي.
جارة 1: شو طابختيلو اليوم؟
جارة 2: رز بلوبية، بيموت فيها هالاكلة.
جارة 1: ايه طيبة كنت بدي اعملها للولاد بس اللوبية غالية هالايام. تلات آلاف. العمى بعيونن لا بق يشبعوا. منين بدّو ياكل الفقير؟ مبعرف.
جارة 2: ايه عاساس صاموا المسيحيّة بس انا اخذت تاكسي و طلعت عالبلد وجبتها بالفين
جارة 1: شاطرة والله
جارة 2: ايه لكن
جارة 1: وشفتي شي بالسوق؟
جارة 2: أي، شفت نقف الدين "لوحة" شي حلو تمام
جارة 1: ايه عاساس عندك حيط ببيتك اسَا فاضي مهاك؟
جارة 2: مظبوط، دبرتلها محل، بتعرفي قديش حقها ؟
جارة 1: لا والله
جارة 2: حطيلك كلمة
جارة 1: مبعرف قولي انتي
جارو 1: شلحيلك شلحة
جارة 2: كعيت
جارة 2: ميت دولار بس
جارة 1: بس؟ يا بلاش.
جارة 2: شفتي انا بلاقي لقطات
جارة 1: نيال جوزك عليك شو موفرة.
جارة 2: يا اختي بتعرفي ظروف صعبة وهلق وقت مدارس لازم حس معو. لشو تجيب شغلات ما الها لزمة ، يعني والله ما الك علي يمين لو ما لازملو البيت هيك شغلي ما جبتها ولا خطرت على بالي من اساسو.
جارة 1: وانا والله كمان جبت فيترين كتير حلوي.
جارة 2: ليش؟ لازمتلك ؟
جارة 1: كيف لكن!!! بدي حطّ فيها كريستال.
جارة 2: ليش عندك كريستال؟
جارة 1: لك له ، بدي اشتريلها كريستال تحطّن بقلبها، معقول فيترين تضلّ فاضية ؟
جارة 2: (تحك رأسها) معك حق، ليش ما دارتلي.
جارة 1: لك ايه فوتيلك شوي لعندي
جارة 2: ما بقدر مستعجلة جوزي ناطر حضرلو ترويقة حرام خطيُ بيكون جوعان.
جارة 1: صحيح، دخلك ليش بنتك جوجو ما عم بتبين؟
جارة 2: ليش ما دريتي ؟
جارة 1: خير شو في؟
جارة 2: ما تركت خطيبها؟
جارة 1: يه شو هو الحكي؟
جارة 2: مثل ما عم قلك.
جارة 1: طيب ليه ؟
جارة 2: ما صار وفق.
جارة 1: الهيئة ما منيح الشب.
جارة 2: هوي بخيل وكحتة وحنتيتي بس نحنا ما بنحب نحكي لحدا، حتى ما يصير لتّ وعجن.
جارة 1: صحيح احسن ، قولو ما في نصيب.
جارة 2: ايه لشو تنحكي على العالم، كل واحد راح بطريقو. يعني اذا الشب شوي مغنّج ومعلّق بأمّو ضروري قول هيك قدّام كل الناس؟
جارة 1: لا ابدا خلي الطابق مستور.
جارة 2: لَكَن يا اختي، هيك احسن كمان زوجي ما بيهين عليه احكي عالعالم ولا انا فيني هالطبع بالاساس.
جارة 1: الحمدلله يا ربي، دخيلك نحنا منا متل هالنسوان يلي بيصطبحوا ساعتين وبينزلوا حكي بالعالم حزّك مزّك، فلانة تطلقت وفلانة تجوزت.
جارة 2: اساسا انا مبعرف كتر حكي، بقول الجملة المفيدة وبس، الي تمّ ياكل وما الي تمّ يحكي. ولك حتى بالاكل مباكل شوفي كيف قالبة مثل قصب المصّ. (تكشف الجارة عن ساق مكتنـزة)
جارة 1: ايه والله شايفتك مغّيرة بس قلت لحالي عاملة ريجيم.
جارة 2: ايه ريجيم طبيعي، عالهم بعيد العنّك.
جارة 1: خير فيه شي تاني؟
جارة 2: في غيرها حماتي الله لااااااااااا يوفقها.
جارة 1: هس بيسمعك جوزك.
جارة 2: ايه يسمع، لَكََن آكلها بجلدي، هي بتروح بالعرض وانا عم بنسلى سلي.
جارة 1: تحمليها. ست كبيرة.
جارة 2: يحملها ابو بريص ان شاء الله، مبيكفيني همّ ولادي؟ تروح عند بنتها تحملها هي، ملبصة عنا قال لأنه جوزي الكبير. الله يلعن هيديك الساعة يلّي خلفته فيها.
جارة 1: ولك شو دخل زوجك؟
جارة 2: ليش هوي انظم؟ على آخر زمن صار بيصّف مع امو ، صار الو لسان يحكي اخونا. هيك الدين بيقلّو ؟؟؟؟
جارة 1: ولك ما هي امّو.
جارة 2: ايه وانا مرتو يعطيني شوية قيمة.
جارة 1: قيمتك محفوظة.
جارة 2: دخيل عينك شو بتفهمي، لا يحرمني من هالجيرة.
تضرب الشمس على اسورة في يد الجارة 2:
جارة 1: شو هيدا عم يلمع بايدك؟
جارة 2: حلوي، هاي مبرومة جديدة؟
جارة 1: حلوي والله مبروكة ، موديل جديد كمان؟
جارة 2: ايه، انا شفتا عند جارتي لبيبة بالبناية على راس الشارع –كنت عمّ زورها لأنو النبي وصّى بسابع جار – يي عرفتي انو اخت جارتها تطلقت، قال شو جوزها حبّ عليها واحدة وهي اسّاها عروس ، يا مأمنة للرجال مأمنة للمي بالغربال. المهم شو بدنا قصة طويلة بحكيلك ياها على رواق. لما شفت هالمبرومة باللحظة تركت كل شي وطلبت جوزي عالتلفون قلتلو ياخدني عسوق الجوهرجية تجيب متلها بتاتا.
جارة 1: قام جبلك ياها ضغري؟
جارة 2: لأ ما كان معو مصاري، قلتلو ما خصّني. بدك تجيب مصاري من تحت الارض، تدّين وجيب. شوف لما انت بتطلب منّي شغلة بحضّرلك بالتكّة.
جارة 1: عافاكي.
جارة 2: لكن لبيبة احسن مني ؟ ما جوزها معتّر اكتر من جوزي وإلو شهر ما ضرب ضربة بمحلّو ، عميصفّر محلّو ما فيه الدومري. ما بعرف كيف دبر حالو بالاخير بس جبلي ياها.
جارة 1: لك، صحي ما انا دقيت عليكي البيت مبارح بعد الضهر ما لقيتك، الهيئة كنتي معو بسوق الجوهرجية؟
جارة 2: لأ انا جبتها اول مبارح، مبارح كنت عند اهل خطيب بنت ام علي جارتنا بآخر الشارع، بتعرفي النبي وصى بسابع جار. يا لطيف شو آدمي وخلوق وابن ناس هالشب.
جارة 1: كان موجود هونيك؟
جارة 2: لأ يوه، كان مع خطيبته، انا مبروح اقعد مع رجال. ما بيهين عليه جوزي,
جارة 1: لكن كيف عرفتي؟
جارة 2: يا اختي واضح من بيتن. الجخّ الرخّ، الخدم الحشم، العفش النفش، الطنافس الخنافس، شي رايح شي جاي، شي طالع شي نازل، شي معلّق شي مطلّق. يعني شي ما بينوصف. ما في غيرنحنا يا حصرة اخدنا موظف على قدنا ما بيخلص الشهر الا وسبقو المعاش. بس وحياتك مباخد لسوسو غير متلو مبخليها تتعذب متلي، خليها تعنّس ولا تتعتر.
جارة 1: بسيطة تفرج، شو عم تحضري عالتلفزيون؟
جارة 2: ميارح كان في برنامج دين حلو، يسلملي عينو هالشيخ ما احلاه طقم وكرافات مهيوب كتير والله .
جارة 1: شو اسمو وعلى اي قناة؟
جارة 2: ما بعرف اسمو هيئتو مصري او خليجي و القناة هيدي ما غيرا بين الميوزيك تي في و الفاشيون تي في ومرسوم عليها من فوق كتاب مفتوح.
جارة 1: ايه عرفتها، عن شو عم يحكي.
جارة 2: ما بعرف يمكن عن النميمة والغيبة، ما اهتميت بالموضوع لأنو الحمدلله ما عندي هالشغلات، بس لما صار يحكي عن النار وعذاب القبر ، انا صرت ابكي وابكي.
جارة 1: يا الله ايه وشو قال كمان؟
جارة 2: انا بعرف قال كل عقربة هونيك قدّ الحيّة مدري الحيّة قد العقربة، يا لطيف الله ينجينا، يعني شي حلو كتير الحقيقة هالشيخ، كل الناس بكيت وانا بكيت معهم. خلاص انا سمعته من هون وقلت بدي اتحجب ما في مجال. ان شاء الله اول ما بيصير عمري خمسين سنة ببقى حاول فكر بالحجاب.... يمكن.
جارة 1: مواظبة عالصلا بهالايام؟
جارة 2: اكيد كيف لكن!! ما بقطع فرض، كل ما صحّلي وقت بقوم بصلّي واوقات بخليهم كلهم لآخر النهار اذا ما صحلّي. يعني اوقات بقطّش لما بشوف حالي ما عم ركّز لأنه يا بصلّي من قلبي يا اما بلا. بس صدقيني ما بذلّ عليك، ما فوتت ولا حلقة من مسلسل هيدا الشيخ يلي قلتلّك عنّو، وكل مرة بخلّص علبة كلينكس من كتر ما ببكي، اي والله.
جارة 1: يا ريت صير عندي هالايمان متلك.
جارة 2: ولك هالدنيا شو فيها؟ ما فيها شي. ما حدن بياخد معو شي. صلّي وصومي وسمعي كلمة زوجك وعملي صلة رحم وما تحكي عالعالم، اهمّا الشي يكون عندك قناعة بتعيشي احلى عيشة. انا هيك بعمل.
يصرخ الزوج ليذكر الجارة بالفطور، فترد عليه الزوجة ان ينتظر.
جارة 2: يا لطيف هالرجال ما بيفكر الا ببطنو ، للسوق وللصندوق عاملني ما معي لحظة وحدة صبّح عالجارة. اوف شو هالعيشة، يلعن الساعة اللي شفتو فيها.
جارة 1: طيب وما عم تابعي عالهوا سوا؟
جارة 2: يخرب بيتن، لهون وصلنا عم يعرضوا بناتن على العالم، لأ ما عم تابعو بالمرّة. كل ما بيطلع على التلفزيون بطفيه. انا في عندي صبايا بالبيت وما بدي يتعلموا هالشغلات.
جارة 1: معك حق. ما فيه اخلاق وشفتي هاي الجزائرية شو بتحكي؟
جارة 2: قريضة تقرضها، بتتخانق مع رفقاتها بالبيت اربع وعشرين ساعة على اربع وعشرين ولسانها طويل ومتل المبرد.
جارة 1: و شفتي هيدي التونسية كمان؟
جارة 2: على اضرب وافكّ رقبة. طول الوقت بطنها مبين متل الليمون ابو صرة. يا عيبشوم. يا لطيف جهنم شو بدَا. لاحقين بلاد برة على الدعسة ها. اذا عطس واحد هونيك بدنا نعطس متلو.
جارة 1: بس السورية مذوقة وكلاس.
جارة 2: صحيح، انا جبتلها لبنتي سوسو ميني جوب متل يللي لابستها.
جارة 1: ابوها بيهين عليه تلبس قصير؟
جارة 2: له شو قصير، لا تغلطي، خمسة سنتي فوق الركبة قصير؟؟؟؟ معلش بدك تسمحيلي فيها. ما فيها شي لأنو هيك دارج، متلها متل هالبنات. وسوسو بنتي عندها اخلاق وبتخاف الله، بتبكي اكثر مني لما بيطلع هيديك الشيخ - دستور من خاطرو - على التلفزيون. كمان متلي هي مفكرة بالحجاب لما بتكبر، هلق خليها تنبسط بعمرها شوي، حرام مبارح اجت حتتعقد.
جارة 2: ليش؟
جارة 1: ابن جارتنا مازن تطلع فيها بالورب.
جارة 1: شو قصتو هيدا ؟
جارة 2: ما بعرف فجأة طوّل دقنو وصار يحط راسو بالارض كلما يشوفنا متل كأنّا شياطين وبيسلّم علينا بصوت واطي بالكاد منسمعو، ما نحنا مربيانو من هوي وفستوك ، شو صرلو؟ ما بعرف.
جارة 1: الهيئة لافي على هول الارهابيين يللي بيحكو عننّ بالاخبار.
جارة 2: انا هيك شايفتلك بكره بيدكوه بالحبس هوي وشيخو. بيستاهلو، طول عمري ما يعجبني منظرن، دخيل عينو ما احلاه هيديك الشيخ عالتلفزيون بالطقم والكرافات.
جارة 1: مبتفوتي عند جارتنا تهنّيها بخطبة بنتها؟
جارة 2: يو وشي هالوش ، هول عالم نَوَر، هبيانين؟
جارة 1: ليش؟
جارة 2: ما شفتيها لسانها شو طويل بتقعد ساعتين على البلكون عم تحكي عالعالم مع الجارة قبالها.
جارة 1: اوف، معقول؟
جارة 2: متل ما عم قلك، لك جوزها ما بينجي من لسانها، معقول ست تحكي على جوزها؟
جارة 1: لا ما بيصير.
جارة 2: طبعا لو مرباية مبتحكي عليه، انا جوزي جوزتين بخرج وعمري ما حكيت عنه شي برّاة الطريق.
جارة 1: اصيلة.
جارة 2: هيك اهلي ربوني، ترباية بيت انا مش ترباية الحارة.
صوت بكاء من الحارة.
جارة 1: ولك ما هيدا ابنك عم يبكي بالحارة؟
جارة 1: ايه والله ، خلودة (اربع سنوات) ليش عم بتبكي؟
خلودة : هيدا عبودي (ابن الجيران ست اعوام) ضربني.
جارة 1: وليه عبودي الكلب ليش ضربتو؟
عبودي : ايه هوي سبّني بالاول وضربني بالحجرة.
جارة 1: ايه ما هوي صغير، بتحط عقلك بعقلو.
عبودي : ايه واذا صغير، وجعني.
جارة 1: وجعك ابو ملعون. صبور علي لأنزل طعميك قتلة، عم تشوف حالك على ولد ازغر منك.
يستنجد ابن الجيران بامه فتطل من الشباك.
الجارة 3: ليش بدك تضربي الصبي؟
الجارة2: ضربلي ابني
الجارة 3: ابنك فيه البركة، قدّو قدّ الفارة وصوتو مملّا الحارة. ضبّيه بالبيت. كمان ليش تتحطي عقلك بعقل ابني الصغير.
الجارة 2: والله لكسّرو ابنك هالبلا ترباية.
الجارة 3: استرجي بركي جلدك عم يرعاك.
الجارة 2: جلدي عم يرعاني يا بنت الهيك وهيك، والله تخلي جوزي يشكيك لجوزك، طلاع وليه خلودة ، ناس بجم.

قرأت نصفها و لم أستطع أن أتابعها

انما تعليقي البسيط:
شو باله طويل اللي كتبها

انا كمان قرات نصفها

ولم اكلملها
لكن دخلكو

جوزها فطر شي حرام ولا لا

قرأت نصفها و لم أستطع أن أتابعها

انما تعليقي البسيط:
شو باله طويل اللي كتبها

هادا الي بيجلس كتير مع النسوان بدة يصير متلهم:confsed:

لا ما فطر اخي هنا الحقيقة
اختي ام ورقة انا كتبتها
ومش قضية بالي طويل
لا تنسوا اني كاتب وعندي عشرة كتب في السوق.. هذه حرفتي...
انا انتقد هذه العادات السيئة عند بعض النساء
القصة فيها انتقاد لاذع للغيبة والنميمة والترف ...
مش محاولة للاضحك او التهريج
بس بدكم مين يركز....
عزام

أعلم ان المغزى ليس الاضحاك و التهريج

و لكن ايضاً لا يمنع ان الذي يستطيع ان يصوّر مثل هذا المشهد بحذافيره يكون باله طويل

أنا مثلاً بالي ليس طويل ، مع اني احب احياناً أن أصوّر بعض المشاهد من الواقع
و لكن تكون غالباً قصيرة و لا تتجاوز 10-15 سطر..

----

من جهة أخرى ، أظن في هذه الأيام انقرضت ثرثرة الجارات، او هي نحو الانقراض
و ذلك لسبب بسيط، ان الجيران ما عادوا يعرفوا بعض

و أطول كلمة ممكن يقولوها لبعض قد تكون : مرحبا

هذا اذا قالوها..

من جهة أخرى ، أظن في هذه الأيام انقرضت ثرثرة الجارات، او هي نحو الانقراض

هذا عندكم في يبروت :) وربما في الاحياء الراقية ايضا فيها فقط..
شو انا جايب هالحوار من خيالي يعني؟
بسجلك على شريط ثرثرة الجارات من على البلاكين عندنا في طرابلس؟
في الاحياء الشعبية خصوصا..
عزام

اخي عزام،
هناك تعليق لم تنتبه إليه :)

ه
شو انا جايب هالحوار من خيالي يعني؟
بسجلك على شريط ثرثرة الجارات من على البلاكين عندنا في طرابلس؟


أعوذ بالله ما قلت انك جايبه من خيالك،
و لو قلت ذلك ما كنت قلت انك "صوّرت" المشهد

اخي عزام،
هناك تعليق لم تنتبه إليه :)
وهناك رد لم تنتبه اليه :)
انا لم اجالسهم بل صوتهم يصل الي من الشرفات
وبعض هذه الاحاديث من ذاكرتي وانا صغير حين كانت جارتنا تزورنا..
الجخ الرخ الخدم الحشم...
الله يرحمها...
عزام

جميل جدا
أنا قرأته بكامله
نقد بمكانه مع شوية بهارات :)
هذا هو حال بعض النسوة وخصوصا بالمناطق الشعبية كما قال عزام

جميل جدا
أنا قرأته بكامله
نقد بمكانه مع شوية بهارات :)
هذا هو حال بعض النسوة وخصوصا بالمناطق الشعبية كما قال عزام
بارك الله فيك شيخي
نعم فيه بهارات صدقت.. التناقض بالكلام فيه مفضوح جدا
في العادة لا يكون التناقض مفضوحا لهذه الدرجة في نفس المحاورة
عزام

ما أضيق العيش لولا فسحة ....... البهارات :)

أبشركم ...
لم استطع أن أكمله!

أبشركم ...
لم استطع أن أكمله!
قلت لكم مسبقا لهجته صعبة عليكم
بالعامية اللبنانية.
عزام

لماذا تحمس الشيوخ لقراءة الحوار حتى آخر كلمة فيه؟

لماذا تحمس الشيوخ لقراءة الحوار حتى آخر كلمة فيه؟
اخي الحبيب بلال
لا تهمل اثر الكومديا الساخرة في التغيير
استطياع موليير القضاء على ظاهرة التكلف من خلال مسرحية ساخرة كتبها عنهم.
اليوم كثير من الناس يجتنبون جمعية اسلامية معينة لكثرة الطرائف التي نسجت حولها والتي اكثرها مبالغ فيها مثل قضية انهم لا ياكلون البيض لان الديك لم يتزوج الدجاجة.
انت تعتمد الاسلوب الساخر في نقدك لتيار المستقبل وهو فعال جدا لدرجة ان لا احد هنا يجرؤ على مدحهم كما يبدو مع اننا نعرف انهم الاغلبية على صعيد السنة في لبنان.
المقال يشير للظواهر التالية وينتقدها املا في تغيير عقلية النساء تجاه هذه الامور:
1- نية الحجاب بدون تنفيذ.
2- التقشف في مكان لا يستحق ذلك والتبذير في مكان آخر.
3- الغيبة والنميمة.
4- الغيرة والحسد والمقارنة مع زوجات اخريات.
5- ظنهن ان التدين بالبكاء والنحيب في حين انه بالطاعة والتنفيذ.
6- نفورهن من اللحى واصحاب العمائم واعتبارهن هذه الامور من خصائص المتطرفين.
7- تقلبهن من قنوات الدين الى قنوات الموبقات بدون احساس بتأنيب الضمير....
واشياء كثيرة اخرى...
والمقال اثر بصورة ابجابية اكثر من النصح في هذه النوعية من النساء .. جربه مع احداهن ان اردت.. ذلك ان النصيحة غير المباشرة تصل الى العقل الباطن بدون ان تصطدم بالتعنت البشري الغريزي الذي يرفض الاعتراف بالخطأ بسهولة.
عزام

الرجال دائماً يستاؤون من ثرثرة النساء

و لكن في المقابل لا ينتبهون الى ثرثرتهم

اذا كنتم مقتنعين بأن نقل مثل هذه الثرثرة قد يكون له أثر ايجابي في تغييرها،

فهل انتم مستعدون لقراءة نقل لثرثرة الرجال؟

الرجال دائماً يستاؤون من ثرثرة النساء
و لكن في المقابل لا ينتبهون الى ثرثرتهم
اذا كنتم مقتنعين بأن نقل مثل هذه الثرثرة قد يكون له أثر ايجابي في تغييرها،
فهل انتم مستعدون لقراءة نقل لثرثرة الرجال؟
اختي ام ورقة ساسحب ترشيحي لك على ما يبدو :)
انا اتفهم الا تكملي المقال الى اخر لكن على الاقل اقراي تعليقاتي بروية وعلقي عليها
انا لا انتقد الثرثرة بحد ذاتها بل التناقض في شخصيات النساء الذي تجلى عبر الثرثرة
عن جد شي غريب تجاهلك لكل ما قلت ووضحت...
وهذه العيوب والتناقضات موجودة على فكرة في الرجال ايضا
فبعضهم يظن ان التدين في البكاء وليس في الطاعة لحكم الله.
طبعا نحن لا نتضايق ان كتبت عن ثرثرة الرجال وان كان الامر لا يستدعي ذلك فعندنا تعليقات الاخ بلال مثال حي على ذلك :)
عزام

نعم يمكنكم الاقتباس من ثرثرات المنتدى

انا ما عندي مشكلة تسحب ترشيحك ، انا لا ادعو أحد ان يرشحني و لا اضغط على احد في ذلك


و لكن انا لم اتجاهل التعليقات و اعرف ان هذا موجود هنا و هناك

و لكن هل يعني هذا انه لا داعي ان اكتب عن ثرثرة الرجال؟

(بس حتى أعرف لأني كنت بدأت أحضر لذلك)

والله افعلي ما تريدين
هذا منتدى حر
عذرا على الجواب الجاف ولكن انا استعمل اسلوبك.
عزام

قلت لكم مسبقا لهجته صعبة عليكم
بالعامية اللبنانية.
عزام
المشكلة ليست باللهجة مطلقا بل بطول النص ... وخاصة أنه يسعى لاثبات شيء مسلم به ..

عموما بارك الله فيك أخينا عزام.

المشكلة ليست باللهجة مطلقا بل بطول النص ... وخاصة أنه يسعى لاثبات شيء مسلم به ..
عموما بارك الله فيك أخينا عزام.
آمين وفيك
ليس نصا طويلا بالنسبة لقصة قصيرة فهذا حجمها في العادة.. ولكن لا ادري لم نظرت اليه وكأنه موضوع علمي يسعى لاثبات شيء.. على كل حال الناس اذواق .. وانا احترم رأيك ورأي الاخت ام ورقة.. وحبذا لو تناقشونا في المواضيع الجدية المهمة التي نطرحها في اماكن اخرى لأنها تقع من ضمن ذوقكم الميال الى التعامل مع المواضيع المطروحة بقالب جدي لا القالب الساخر.
عزام

انا قلت في السابق اني احياناً التقط من الواقع صوراً و قد تكون في قالب يشبه هذا القالب الذي أسميته انت "ساخر" .. مع اني لا احب هذه التسمية
و لكن لقطاتي لا تكون طويلة.. فأنا لذلك قلت رأيي بالنسبة للطول و ليس الأسلوب، اذا راجعت ردي ستلاحظ
بالنسبة لي الفكرة قد تصل من اول 10-15 سطر.. أقول هذا بالنسبة لي

و هذا لا يعني اني الزم الآخرين برأيي

ربما كان يجب ان أكتفي بتأمّل الموضوع دون أن أعطي رأيي

أما بالنسبة للمواضيع الجدية، طبعاً انا أحب ان استفيد منها

اما ان اناقشها، فلا اظن ان بوسعي ان اناقش كل المواضيع و بخاصة اذا كانت أكبر من علمي الضيّق والمحدود..

انا قلت في السابق اني احياناً التقط من الواقع صوراً و قد تكون في قالب يشبه هذا القالب الذي أسميته انت "ساخر" .. مع اني لا احب هذه التسمية
و..
لا مشكلة في الادب الساخر ان كان الكاتب لا يتناول اشخاصا معينين
بل يتناول ظواهرا معيبة في المجتمع يسخر منها
حتى القرآن الكريم يستعمل هذا الاسلوب
ذق إنك أنت العزيز الكريم
سورة الدخان
عزام

حتى القرآن الكريم يستعمل هذا الاسلوب
ذق إنك أنت العزيز الكريم
السلام عليكم،
اخي واستاذي العزيز،
لا اظن انه يجوز لنا ان نقول ان القرآن الكريم فيه أسلوب ساخر والله اعلم
إن هذه الآية تستخدم اسلوباً بيانياً نسيته ولكنه موجود في كتاب السيوطي والله اعلم ولعله الطباق المعنوي

وهناك رد لم تنتبه اليه :)
انا لم اجالسهم بل صوتهم يصل الي من الشرفات
وبعض هذه الاحاديث من ذاكرتي وانا صغير حين كانت جارتنا تزورنا..
الجخ الرخ الخدم الحشم...
الله يرحمها...
عزام
شيخي يعني افهم من جنابك ان والدك كان مريض ام والد جيرانك :)

السلام عليكم،
اخي واستاذي العزيز،
لا اظن انه يجوز لنا ان نقول ان القرآن الكريم فيه أسلوب ساخر والله اعلم
إن هذه الآية تستخدم اسلوباً بيانياً نسيته ولكنه موجود في كتاب السيوطي والله اعلم ولعله الطباق المعنوي
توقعت ان يعترض احدهم.
سنفتح موضوعا دينيا منفصلا في هذا الموضوع
تابعه من فضلك...
عزام

السلام عليكم ...
لا أقصد أي شيء غير ما كتبت "والله".
فان النص طويل وفي غير ما "أهوى".

الامور الساخرة والتي يرتجى منها ايصال هدف معين وخاصة الحوارية منها وخاصة ما يكتب في المنتديات لا يحبذ أن تكون طويلة .

وأما بخصوص تحويلي للموضوع بانه علمي ويريد الوصول لنتيجة ما ...
فانه ليس بعلمي ولكنه كُتب للوصول الى أن الثرثرة تكثر بين النساء وهذا مسلم به بل سلمنا بما هو أكثر أيضا!

ربما كان من الافضل الا أعلق أنا أيضا.
ولكن تعليقي جاء للتنبيه فأنا أحب النصوص "الادبية" أيا كان نوعها مادامت تقدم فائدة بشرط الا تزيد عن حدها فذلك ذو نتيجة سلبية لكاتبها ولقارئها و "لناقلها".

حفظك الله أخي عزام.

وأرجو ألا تحرمنا من كتاباتك في هذا الباب ولكن على أن يكون كما "يريده القراء" ... هذا طلب ورجاء حتى لا تحرمنا المتابعة والقراءة.

وأرجو ألا تحرمنا من كتاباتك في هذا الباب ولكن على أن يكون كما "يريده القراء" ... هذا طلب ورجاء حتى لا تحرمنا المتابعة والقراءة.
ان شاء الله نضع مقالات الطنطاوي الساخرة هنا فهذا افضل
كتاباتي ساحتفظ بها لنفسي. :)
هذه الانواع من الخواطر او السكتشات لا تحلل ولا تفصل.. مثلها مثل لوحات الاخت حلا.. اما تعجبكم او لا.. لا يمكن ان تأتي عند حلا وتقول لها ارسمي هكذا فانا احب هذه الالوان.. لا احد يستطيع ان يكتب خواطره كما يريد منه الناس.. لانها ليست مواضيع علمية او يحوث..
عزام

نعم صدقت ...

نعتذر عن الإعتراض اخي عزام ولكن الحق حق :)

نعتذر عن الإعتراض اخي عزام ولكن الحق حق :)
لا افهم ما تقصد :)
ان كنت تقصد قضية الاسلوب النقدي اللاذع في القرآن فقد طرحت موضوعا منفصلا في ركن القرآن الكريم وانتظر ردك عليه.. انا لا يعنيني المصطلح.. بل يهمني الاعتراف ان هناك اسلوب نقد لاذع في القرآن وسموه ما شئتم.. انا لا اتوقف طويلا عند حرب المصطلحات.. الله يعيننا عليكم في هذا المنتدى... كل كلمة بدكم تدققوا فيها.. يا محلا الاحباش :)
عزام

حقاً أعانك الله علينا

و لكن.. أعجبتني قصة الإقرار بأن هناك طريقة للدعوة عبر النقد اللاذع

فكان هناك بالماضي من يحارب هذه الطريقة و يريدون ان تكون الدعوة هي فقط بالكلام المعسول

فإذا كان هناك من يؤمن بأن قليل من "اللذع" قد يفيد أحياناً فهذا أمر يستدعي الاهتمام ..

حقاً أعانك الله علينا
و لكن.. أعجبتني قصة الإقرار بأن هناك طريقة للدعوة عبر النقد اللاذع
فكان هناك بالماضي من يحارب هذه الطريقة و يريدون ان تكون الدعوة هي فقط بالكلام المعسول
فإذا كان هناك من يؤمن بأن قليل من "اللذع" قد يفيد أحياناً فهذا أمر يستدعي الاهتمام ..
بارك الله فيك اختي ام ورقة
نعم هذا الاسلوب موجود في الدعوة وليتنا نبحث عن الامثلة في القرآن والسنة التي تتبنى هذا الاسلوب.. ليتنا ننتقل الى الموضوع الذي فتحته في ركن القرآن الكريم.
على فكرة انا مواضيعي ليست معقدة وبامكانك ان تشتركي فيها.. انا اسلوبي بسيط جدا ومفهوم..
عزام