تسجيل الدخول

مشاهدة النسخة كاملة : مسرحية..عنوانها الانتخابات العراقية،،،،،،،، ابطالها....المرشحون و القوائم



mustafa4end
12-19-2005, 10:30 AM
اعزائي واحبائي
السلام عليكم ورحمة الله
كان هذان اليومان الماضيان حافلين بالاحداث الجميلة والطريفة .. فمع اندلاع حرب الانتخابات بدات تظهر الى الجمهور (المتفرجين اللي همه احنا) بعض خبايا السياسيين العراقيين الحلوين .. وانكشفت بعض اخلاقياتهم الروعة ..
نبدا مع علاوي (الذي كبر وبصف الاول صار ) .. علاوي يتحارش بالجماعة اصحاب قائمة (طركاعة طركاعة طركاعة) .. فقام بزيارة مطار المثنى وزيارة الجيش العراقي هناك الذي قام بعمل استعراض عسكري .. لكن المشكلة هي (ما هي الصفة التي يستعرض الجيش بها لعلاوي ؟) فالجيش لا يستعرض الا لرئيس الوزراء او الجمهورية او وزير الدفاع او من يخولهم هؤلاء .. لكن علاوي كما قلنا يتحارش بالربع اصحاب قائمة (دريل دريل دريل ) ..
الجعفري ثارت عنده الغيرة والحمية على منصبه .. وانتفض على علاوي وقال هاي مو من صلاحياته !! والجلبي قال (هذا انقلاب عسكري)!! .. والجمعية المو وطنية شكلت لجنة تحقيقية للموضوع فالشغلة موهينة .. شرف رئيس الوزراء صار على المحك !!
لكن الصدفة وحدها دفعت وزير دفاع انكلترا لزيارة العراق .. والاخ زار القطعات العراقية في البصرة من دون أي مرافق رسمي (مرافق مو يعني تواليت) .. مع ذلك فاخوانا في قائمة (هوسة هوسة هوسة ) ما احتجوا ولا اعترضوا والسيد الجعفري ما ثارت عندة الحمية .. وزير الدفاع البريطاني استعرض القوات العراقية وابلغهم ان الجيش الانكليزي سيعيد تشكيل الشرطة العراقية في البصرة .. ورغم اننا دولة ذات سيادة يحكمها (سيد) فهذا السيد وقائمته (بلوة بلوة بلوة ) ما قالوا شي .. باعتبار ان زيارة وزير الدفاع البريطاني كانت من باب الميانة .

علاوي بعده يتحارش .. راح وزار ضريح الامام بالنجف .. وهو يعرف زين ان الجماعة اصحاب قائمة (جذابين جذابين جذابين) مسيطرين على الضريح ويتكلمون باسم الامام .. لكنه يتحارش .. والنتيجة انه انضرب بالنعل (اجلكم الله ) وهي حادثة مخزية !! كيف ينضرب بالنعال وهو في (حمى امير المؤمنين) ؟ لكن الجماعة اللي كتلوا الخوئي داخل الحضرة ما يهمهم .. والجماعة اللي باكوا الحضرة هم ما يهمهم .. والجماعة اللي بسطوا وزير الصحة من زار الحضرة هم ما يهمهم .. وكلهم موجودين بقائمة ( عصابة عصابة عصابة )..

علاوي ما يجوز .. سوى مؤتمر صحفي وقال سوف نؤدبهم .. والمشكلة انه احضر معاه اثنين يفتهمون .. وقلة من سياسيي العراق يفتهمون .. الاول مهدي الحافظ والثاني الباجه جي .. الجماعة قعدوا وفصخوا قائمة (الثول الثول الثول ) من الناحية الاقتصادية بدراسات علمية موثقة .. وكشفوا انه الجماعة طلعوا (هب بياض ) بالسياسة والاقتصاد و كلشي ماكو .. يعني بس لطم وضيم ..

لكن اصحاب قائمة (لطمية لطمية لطمية ) ما سكتوا .. اتهموا علاوي بالفساد وقالوا انه الحماية مالته يسبون الامام المهدي !! ومو بس هيجي .. محافظ النجف قال ما معناه (علاوي يستاهل ينضرب بالنعال لانه مدح البعثيين بالحضرة ).. طبعا هاية عز الديمقراطية .. لذلك الربع بداوا يمزقون لافتات علاوي ومن لف لفه .. يعني الشعلان والتوافق .. وهذا جزء من الديمقراطية اللي اتعلموها الربع بايران .. ولاكمال الوضع الديمقراطي انكتل شاب بالبصرة واثنين بالثورة كانوا يعلقون لافات تاييد لعلاوي .. ديمقراطية مو بالله ..

علاوي بين ليلة وضحاها تحول الى داعية حقوق انسان .. ملاك نازل من القدرة .. الهة العدل عند اليونان .. علاوي اتهم الحكومة بانها تمارس التعذيب على العراقيين .. ومو بس هيجي .. قال علاوي ان هذه الحكومة اسوء من حكومة صدام من حيث سجلها في انتهاك حقوق الانسان .. اصحاب قائمة (تعذيب تعذيب تعذيب) انتفضوا وقالوا هذا التصريح مو صحيح .. همة شكم الف معتقل وشكم الف حالة تعذيب وشكم مدينة اقتحمناها .. وذكروا علاوي وقالوا له انته اول من قصف المدن ونبشها على اهلها بالفلوجة والنجف والثورة ..

الشغلة ما خلصت لهنا .. جماعة قائمة (ميليشيا ميليشيا ميليشيا) قالوا ان المرجعية صدرت بيان دعم للقوائم الشيعية القوية ... وعدم دعم العلمانيين (الكفرة) وعدم دعم القوائم الصغيرة .. يعني بين قوسين (انتخبونا) .. علاوي احتج وخاف انه ينعاد الفلم مال الانتخابات الماضية .. رغم ان الناس بعد ما يصدقون هيجي شي بس بعد اكو قشامر لحد الان مع الاسف .. ولانه الناس طلعوا مظاهرات قبل اشهر يهتفون بيها (قشمرتنا المرجعية وانتخبنا السرسرية) فالمرجعية سارعت واصدرت بيان نفي انها تدعم أي قائمة حتى لا تجيب حجي على نفسها .. مو بس هيجي .. ممثل السيستاني قال ان حكومة الجعفري (فشلت) في توفير الخدمات و تحقيق أي شيء من برنامجها الانتخابي .. علاوي ركص بجفية لتصريح مكتب السيد .. بس مع ذلك السيد ممكن يغير رايه باخر لحظة ويدعم قائمة ( طائفية طائفية طائفية) ..
اخر بوري اكلته قائمة ( فشل فشل فشل ) من مقتدى .. اللي عبالة السياسة قشمرة ويومية طالعلهم براي .. الجماعة اتفقوا وياه انه يدعم قائمتهم مقابل ربع المقاعد .. حصل مقتدى على ربع المقاعد بس ما دعمهم ولا اصدر بيان يدعمهم .. والقازوغ اللي نطاهم اياه انه جماعته اعلنوا قائمة مستقلة اخرى هي قائمة رساليون اللي بيها عدد من رجال الدين الصدريين البارزين .. فقائمة (بوري بوري بوري) تتوسل بالصدر حتى يبين موقفه والاخ مطنش ..

فلم الانتخابات طويل وراح نتونس وياه والى اللقاء في حلقات اخرى ...

ولا تنسوا ان تنتخبوا قائمة ( انلاصت انلاصت انلاصت ) ..

fakher
12-19-2005, 10:51 AM
أهلا بالمشترك مصطفى ...
مقال جميل ... الله يعطيك العافية

mustafa4end
12-19-2005, 11:16 AM
الف هلا بيك اخي فاخر شكرا للمرور :3smilie: